Во Русија денеска продолжува вториот ден од тридневното гласање за пратеници во Државната дума на деветтиот состав, како и за законодавни тела и раководители во регионите. Гласањето се одржува од 18 до 20 септември.
На изборите за Државната дума првпат учествуваат и жители на териториите на Украина што Русија ги анектираше во 2022 година – Доњецк, Луганск, Запорожје и Херсон. Анексијата на овие територии не е меѓународно призната.
На федералните изборни листи се наоѓаат 10 партии: Единствена Русија, Комунистичката партија на Руската Федерација, Либерално-демократската партија на Русија, Нови луѓе, Праведна Русија, Руската партија на пензионерите за социјална правда, Комунистите на Русија, Родина, Руската еколошка партија „Зелени“ и Партијата на директна демократија.
Истовремено се одржуваат избори за законодавните собранија во 39 региони, како и за највисоките функционери на субјектите на Руската Федерација. Во осум региони раководителите се избираат директно, додека во три региони ќе бидат избрани од регионалните парламенти.
Вкупно се избираат 450 пратеници во Државната дума – половина преку партиски листи, а половина во едномандатни изборни единици.
Според руската Централна изборна комисија, излезноста на првиот ден до 20:13 часот по московско време изнесувала 25,30 отсто, додека повеќе од 2,8 милиони луѓе гласале преку платформата за електронско гласање.
Во рамки на изборниот процес се одржуваат повеќе од 2.200 изборни процеси на различни нивоа, со кои треба да бидат избрани околу 20.700 пратеници и раководители на локалните администрации.
Гласањето во областите под руска контрола на територијата на Украина предизвика критики од украинските власти и меѓународни организации, кои не го признаваат руското анектирање на овие територии.
