Дводневната Регионална конференција за фемицид во Југоисточна Европа, која се одржа во Собранието, заврши со препораки за унапредување на превенцијата, истрагите и институционалниот одговор кон фемицидот.
Во текот на вториот ден се разговараше за препознавањето и истражувањето на родово поврзаните убиства, како и за потребата од јасни и усогласени оперативни стандарди. Беше истакната важноста од соодветно документирање на случаите, бесплатна правна помош и навремено препознавање на родово базираниот мотив.
Посебно внимание беше посветено и на собирањето податоци за фемицидот. Учесниците нагласија дека квалитетните и систематизирани податоци се основа за подобро разбирање на појавата, креирање политики и поефикасен институционален одговор.
Во завршницата беа издвоени потребата од обука на јавните обвинители и другите чинители, унапредување на проценката на ризик и подобра поддршка и заштита на децата погодени од случаи на фемицид.
Како клучни области за понатамошно дејствување беа посочени навременото препознавање на родово базираниот мотив, ефективното спроведување на законодавството, подобрувањето на податоците и нивното користење, како и ефикасниот институционален одговор и политичката волја.
Конференцијата овозможи размена на искуства и препораки од земјите од Југоисточна Европа со цел зајакнување на механизмите за заштита од родово базирано насилство.
