Српскиот претседател Александар Вучиќ денеска, 27 септември, ќе поднесе оставка од функцијата, што го најави во повеќе наврати. Според неговата последна најава, оставката треба да ја поднесе вечерва околу 20 часот, по што ќе ѝ се обрати на јавноста и ќе ја образложи својата одлука.
Вучиќ претходно најави дека по повлекувањето од претседателската функција ќе се вклучи во кампањата за предвремените парламентарни избори како граѓанин. Изборите се закажани за 25 октомври, откако на 9 септември беше распуштен српскиот парламент.
Неговото повлекување од функцијата доаѓа во период на долготрајни студентски протести и барања поврзани со одговорноста за уривањето на настрешницата на железничката станица во Нови Сад во ноември 2024 година, при што загинаа 16 лица.
Вучиќ на 14 септември соопшти дека оставката ќе ја поднесе на 27 септември, а подоцна прецизираше дека тоа најверојатно ќе се случи околу 20 часот.
Предвремените парламентарни избори на 25 октомври ќе се одржат во услови на политичка неизвесност и продолжени студентски протести, додека Вучиќ најави дека ќе се кандидира за премиер на изборите.
