Вучиќ најави „дигитална армија“ во Србија: Војниците што помалку изложени на опасност

Србија работи на создавање таканаречена „дигитална армија“, со која во иднина би се намалила изложеноста на војниците на бојното поле, најави српскиот претседател Александар Вучиќ. Тој посочи дека станува збор за сложен процес кој бара време и значителни вложувања.

— реклама —

„Во моментот кога нашето борбено возило ќе забележи цел и мета, тоа веднаш испраќа дигитален сигнал до нашата ракетна артилерија за таа да може да дејствува. Нема објаснување и јавување, како во филмовите, туку само со притискање едно копче“, изјави Вучиќ.

— реклама —

Тој рече дека на тактичката воена вежба бил прикажан напад со роботизирани беспилотни системи, при што, како што наведе, на целото подрачје немало ниту еден човек.

— реклама —

На вежбата биле претставени и малите роботизирани системи „Милош“, како и роботизирани возила во форма на кучиња опремени со фрлачи на гранати, противоклопни средства и митралези со калибар 7,62 милиметри. Биле прикажани и осум видови беспилотни летала, од кои дел биле соборени во текот на вежбата.

— реклама —

„Тоа го правиме за да ги зачуваме мирот и стабилноста. На сите им е јасно дека не сакаме никого да загрозиме. Сакаме мир и стабилност, сакаме сами да го чуваме нашето небо и нашата земја“, порача Вучиќ.

Во врска со повторното воведување на задолжителниот воен рок, српскиот претседател рече дека се подготвува негово воведување од март следната година.