Вучиќ победи само во три града на југот на Србија

Студентската листа оствари победа во 26 од вкупно 29 градови во Србија, според прелиминарните изборни резултати, додека листата предводена од Александар Вучиќ и Српската напредна странка (СНС) освои најмногу гласови во само три града.

Најдобри резултати за СНС биле забележани во Врање, Прокупље и Лесковац, сите на југот на Србија. Во Врање партијата освоила 53,19 отсто од гласовите, наспроти 41,21 отсто за студентската листа. Во Прокупље разликата била 52,74 наспроти 42,84 отсто, додека во Лесковац СНС добила 49,25 отсто, а студентите 44,72 отсто.

— реклама —

Во најголемите градови во Србија студентската листа остварила убедлива предност. Во Белград освоила 63,61 отсто од гласовите, додека листата на Вучиќ добила 31,95 отсто. Сличен резултат имало и во Нови Сад, каде што студентите освоиле 63,80 отсто, а СНС 31,88 отсто. Во Ниш студентската листа добила 60,44 отсто од гласовите.

— реклама —

Над 60 отсто од поддршката студентите освоиле и во Чачак, Ваљево и Ужице. Во Чачак добиле 62,20 отсто, во Ваљево 62,12, а во Ужице 61,36 отсто од гласовите. Значителна предност имале и во Панчево и Крагуевац.

Најнеизвесна била трката во Кикинда, каде што студентската листа освоила 47,15 отсто, наспроти 46,70 отсто за СНС. Во Лозница разликата била помала од еден процентен поен, со 48,47 отсто за студентите и 47,69 отсто за листата на Вучиќ.

— реклама —

Во Нови Пазар студентската листа освоила 40,10 отсто од гласовите, додека СНС добила 19,61 отсто. Според објавените податоци, тоа е најнискиот резултат на листата на Вучиќ меѓу 29-те градови, при што значителен дел од гласовите биле распределени меѓу други политички опции, особено малцинските.

На ниво на цела Србија, според прелиминарните резултати наведени во извештајот, студентската листа освоила 52,65 отсто од гласовите, додека листата „Александар Вучиќ – Обединета Србија“ добила 39,22 отсто. Вучиќ го признал изборниот пораз и им ја честитал победата на противниците, а претседателот на СНС, Милош Вучевиќ, најавил дека партијата ќе дејствува како опозиција.

Резултатите укажуваат на пораз на СНС во голем број градови во кои со години имала силна поддршка. Сепак, станува збор за прелиминарни податоци што може да претрпат промени до завршувањето на пребројувањето на гласовите.