Претседателот на Србија, Александар Вучиќ, претстави план во пет точки за идниот развој на државата, најавувајќи реформи во економијата, образованието, енергетиката и јавната администрација, како и борба против ароганцијата и злоупотребата на моќта.
Вучиќ оцени дека светот се менува побрзо од кога било и дека Србија мора да се приспособи на новите глобални околности, особено во услови на силна конкуренција меѓу САД и Кина и променетата позиција на Европа.
Тој посочи дека циклусот од 2014 до 2026 година е завршен со, како што наведе, историски економски резултати. Според него, невработеноста е намалена од 26 на осум проценти, а бруто-домашниот производ пораснал од 32 на речиси 100 милијарди евра.
Сепак, српскиот претседател нагласи дека се неопходни нови и длабоки промени за да се задржи економскиот раст и да се подобри животниот стандард.
Во првата точка од планот, Вучиќ предлага драстично намалување на бројот на министри, државни секретари и други функционери, како и укинување агенции и институции кои, според него, немаат суштинска улога.
Втората точка се однесува на зголемување на продуктивноста и работната ангажираност. Вучиќ порача дека Србија ќе мора „да работи повеќе, а не помалку“, отфрлајќи ги идеите за скратување на работното време.
Третата точка предвидува целосна реформа на образовниот систем, со поголема отвореност кон светот и посилно воведување на дуалното образование, со цел младите подобро да се подготват за пазарот на трудот.
Во четвртата точка, Вучиќ најавува сеопфатен пристап кон енергетиката, вклучително и употреба на нуклеарна енергија. Тој смета дека Србија нема да може да обезбеди долгорочна енергетска стабилност без изградба на мали и големи нуклеарни постројки.
Петтата точка се однесува на забрзан развој на роботиката, вештачката интелигенција и современите технологии, како и продолжување на инвестициите во суперкомпјутери и дата-центри.
Осврнувајќи се на состојбите во општеството, Вучиќ призна дека власта не успеала да ги ослободи граѓаните од, како што наведе, ароганцијата и бахатоста на поединци на функции.
„Не успеавме да им се спротивставиме на самобендисаните и арогантни властодршци, препознатливи по реченицата – „Знаеш ли кој сум јас?“, наведе Вучиќ, додавајќи дека никој не смее да биде понижуван или непочитуван.
Тој призна и лична одговорност, оценувајќи дека премногу внимание било посветено на економските резултати, а недоволно на човечноста, емпатијата и односот кон обичните луѓе.
Во текстот, Вучиќ ја критикуваше и опозицијата, оценувајќи дека во изминатата година покажала повеќе ароганција и суета отколку власта, без јасна програма и конкретни резултати.
На крајот порача дека Србија се наоѓа пред период на големи промени и дека државата мора да ја менува не само инфраструктурата, туку и свеста и односот кон општеството и иднината.
