Халкидики под засилена тревога: Забранет пристапот во шумски подрачја, казната е 300 евра

Поради зголемениот ризик од шумски пожари, денеска на Халкидики стапија во сила ограничувања за сообраќај и движење на лица во одредени шумски подрачја.

— реклама —

Забраната важи од 8 до 20 часот и ги опфаќа подрачјата на општините Касандра, Ситонија и Аристотелис, каде што опасноста од пожари е проценета на трето ниво.

Надлежните служби најавија дека ќе бидат отстранети и возилата и лицата кои ќе бидат затекнати во подрачјата опфатени со забраната. Локалните власти ги повикаа жителите и туристите строго да ги почитуваат мерките и упатствата на надлежните.

— реклама —

За прекршување на забраната предвидена е глоба од 300 евра.

— реклама —

Во меѓувреме, во Атика и уште шест грчки области е прогласен црвен аларм поради опасност од пожари, со зголемена подготвеност на сите надлежни служби.

Високите температури, кои локално се очекува да достигнат до 40 степени Целзиусови, во комбинација со силни налети на ветер и долготрајната суша, значително го зголемуваат ризикот од избувнување и брзо ширење на пожари.

— реклама —

Мерките беа донесени по состанокот на Комитетот за процена на ризик, по што службите ги засилија превентивните активности и оперативната подготвеност низ земјата.