Палестинското движење Хамас побарало привремен имунитет за околу 200 свои припадници кои се наоѓаат во подземните тунели во Рафа, за да им се овозможи преместување во рамките на таканаречената „Жолта линија“ – зона во која се повлекле израелските одбранбени сили (IDF). Веста ја објави израелскиот Jerusalem Post, повикувајќи се на информации на Al Jazeera, која пренесува дека меѓу двете страни се водат директни разговори.
Овој потег, според израелски извори, укажува дека IDF е свесен за присуството на борци на Хамас во тунелите на одредени делови од Појасот Газа, што претставува кршење на постојниот договор за прекин на огнот. Според Army Radio, дел од борците во последните недели нападнале израелски војници и отвориле оган кон нивните позиции. Израелските власти засега не ги коментираат информациите, ниту од Кабинетот на премиерот ниту од Министерството за одбрана.
Според Al Jazeera, посредници во преговорите разгледуваат можност дел од борците на Хамас да бидат пренесени надвор од Жолтата линија со возила на Меѓународниот Црвен крст, но планот сè уште чека израелско одобрување.
Минатиот месец, IDF размислувал за повторен влез во неколку области од кои претходно се повлекол, токму поради тоа што Хамас го прекршувал прекинот на огнот.
Истовремено, во неделата израелската војска потврдила дека елиминирала палестински борец кој ја преминал Жолтата линија и им се заканувал на војниците на тоа подрачје. Воздушните сили на Израел го нападнале и убиле напаѓачот по краток престрел.
Воените власти најавија дека се поставуваат физички ознаки долж Жолтата линија, воспоставена како дел од мировниот договор постигнат со посредство на Соединетите Американски Држави, со цел јасно да се дефинираат границите и да се спречи понатамошно нарушување на прекинот на огнот.
