Министерството за внатрешни работи на Хамас соопшти дека началникот на полициските сили во северниот дел на Појасот Газа, бригадниот генерал Абдел Насер ал-Макадма, загинал во израелски воздушен напад.
Според соопштението, Ал-Макадма, познат и како „гувернер на северна Газа“, бил убиен при напад врз областа Шеик Радван, северно од градот Газа, објави „Тајмс оф Израел“.
Во одделен израелски воздушен напад во бегалскиот камп Нусејрат, во централниот дел на Појасот Газа, загинал палестински медицински работник, соопштија медицинските служби. Тие додаваат дека починал и полицаец кој бил ранет во израелски напад минатата недела.
Од Израелските одбранбени сили (ИДФ) засега нема официјален коментар за овие информации.
