На аеродромот на Тенерифе на Канарските Острови настанал хаос кога повеќе од 70 патници, меѓу кои и семејства со деца, го пропуштиле летот на нискобуџетната компанија Ryanair поради повеќечасовно чекање на пасошка контрола, по што останале заглавени на островот.
Според сведоштва на патници, проблемите започнале веднаш по пристигнувањето на аеродромот, кога се формирале долги редици на контролата за пасоши, со чекање што траело околу два и пол часа.
Една патничка на социјалната мрежа TikTok опишала дека патниците, и покрај тоа што навреме се упатиле кон излезната порта по добивање информации за летот преку мобилната апликација, сепак пристигнале предоцна бидејќи авионот веќе заминал.
Таа навела дека не биле единствени, туку околу 70 патници го пропуштиле летот, најголем дел семејства со мали деца и бебиња. Според нејзините тврдења, авионот останал извесно време на пистата додека бил истоваруван багажот на патниците кои не се качиле, но на крајот тие не биле вратени во системот за поаѓање.
Патниците биле принудени сами да бараат алтернативни решенија, вклучително и нови сместувачки капацитети, додека следните летови кон нивните дестинации биле закажани дури неколку дена подоцна. Инцидентот предизвикал бројни реакции на социјалните мрежи, каде што други патници споделувале слични искуства и незадоволство од организацијата на аеродромските процедури.
