Трката за Големата награда на Каталонија во класата Мото ГП беше прекината по сериозна несреќа во која учествуваа неколку водечки возачи.
Инцидентот се случи на патеката „Барселона-Каталуња“ во Монмело, кога Шпанецот Алекс Маркез, возејќи за Дукати-Грезини, во борба за водството удри во мотоциклот на сонародникот Педро Акоста.
По контактот, Маркез со голема брзина излета во заштитната зона и падна, а неговиот мотор неколкупати се преврте на патеката. Во инцидентот настрада и Италијанецот Фабио ди Џанантонио, кој падна откако го погоди дел од уништениот мотор на Маркез.
Организаторите веднаш ја прекинаа трката за расчистување на патеката.
Алекс Маркез бил свесен по несреќата, но со медицинско возило бил пренесен во болница на дополнителни прегледи.
Во меѓувреме, Педро Акоста успеал да се врати до боксот со оштетен мотор, додека Французинот Јоан Зарко бил погоден од делови од моторите и видливо куцал по инцидентот.
Трката продолжи по прекинот, но хаосот не запре. Наскоро следуваа нови падови во кои беа вклучени Франческо Бањаја, Лука Марини и Зарко.
Подоцна Раул Фернандез предизвика уште еден инцидент, откако агресивно влезе во Хорхе Мартин, кој повторно падна и бесно реагираше по враќањето во боксот.
На крајот, победата ја однесе Фабио ди Џанантонио.
