Македонски државјанин е главен осомничен за убиството на 45-годишна жена во близина на Ханија на грчкиот остров Крит, а според грчките медиуми, тој веќе го признал злосторството.
Како што објавува грчкиот портал „Прототема“, станува збор за 43-годишен македонски државјанин кој живеел како потстанар во куќата на Ставрула Левендаки, која исчезнала на 30 мај. Нејзиното тело било пронајдено утрово во рурална област во близина на Ханија.
Според досегашните информации, осомничениот признал дека по расправија со сопственичката на куќата ја нападнал и ја убил, а потоа го ставил нејзиното тело во вреќа и со автомобил го пренел до нива, оддалечена околу пет километри од куќата, каде што го закопал.
Првичните наоди покажуваат дека жената имала повреди во пределот на градниот кош, како и повреда на главата, која најверојатно била нанесена со железен предмет.
Осомничениот тврдел дека расправијата избувнала поради штета што ја предизвикал во куќата. Сепак, грчката полиција со претпазливост ја разгледува неговата верзија на настаните и ја испитува можноста мотивот за убиството да бил од сексуална природа.
По повеќечасовно испрашување, истражителите од Одделот за борба против криминалот во Ханија успеале да добијат признание од осомничениот, кој, според информациите, детално ги опишал случувањата од утрото на 30 мај.
Тој им го покажал и местото каде што го сокрил телото на 45-годишната Ставрула Левендаки.
Во областа Ватолакос кај Ханија и натаму се присутни бројни полициски екипи и криминалистички служби, кои работат на целосно расветлување на случајот што ја потресе локалната јавност на Крит.
Се очекува грчката полиција во текот на денот да излезе со официјално соопштение за околностите на злосторството и доказите што довеле до негово расветлување.
