Маж (37) од Хрватска останал без повеќе стотици евра откако истиот ден двапати бил измамен при обид да купи звучник преку оглас на социјална мрежа.
Необичниот случај се случил во вторникот, а 37-годишникот го пријавил во полиција во четвртокот, објавено е на веб-страницата на хрватската полиција.
Првата измама се случила на 5 мај околу пладне, кога мажот пронашол оглас на германски јазик за продажба на звучник.
Како што се наведува во соопштението, откако со непознат продавач договорил купување преку апликација за допишување, прво уплатил неколку десетици евра за достава, а потоа и неколку стотици евра, колку што изнесувала цената на звучникот.
Потоа, измамникот почнал да го убедува да врши дополнителни уплати за разни осигурувања и трошоци, уверувајќи го дека без тоа не може да му го испрати пакетот.
Тогаш мажот сфатил дека е измамен и одбил понатамошни плаќања.
Истиот ден во попладневните часови, повторно на огласите пронашол друг оглас за звучник, исто така на германски јазик.
Сценариото се повторило: по договорот со продавачот, уплатил неколку десетици евра за осигурување, потоа неколку стотици евра за самиот уред, како и уште стотина евра за достава.
И овој измамник потоа побарал дополнителни пари за наводни трошоци, но 37-годишникот сфатил дека повторно станува збор за измама.
