Дваесет и четиригодишен мотоциклист загина во тешка сообраќајна несреќа што вчера вечерта се случила во местото Пешќеница, на подрачјето на Лекеник, во Хрватска.
Според соопштението на сисачко-мославската полиција, несреќата се случила околу 19:20 часот. При увидот било утврдено дека младиот возач, управувајќи мотоцикл со загрепски регистарски таблички, при излегување од свиок не ја прилагодил брзината на условите на патот, поради што ја изгубил контролата над возилото.
Мотоциклот излетал од коловозот, завршил во одводен канал и удрил во бетонскиот дел од влез на двор.
Дваесет и четиригодишникот починал на местото на несреќата.
Телото е пренесено во Општата болница во Сисак, каде што ќе биде извршена обдукција, а полицијата ќе достави извештај до надлежното државно обвинителство.
