Нови детали за трагедијата во Хрватска: Возачот тврди дека му се слошило зад воланот, одреден му е притвор

Нови детали се појавија за тешката автобуска несреќа во Хрватска, во која загинаа две патнички, а 30 лица беа повредени. Возачот на автобусот на „Ниш експрес“, кој излетал од автопатот А3 кај Иваниќ-Град, тврди дека не заспал зад воланот, туку дека ненадејно му се слошило поради здравствени проблеми поврзани со дијабетесот.

— реклама —

На 55-годишниот српски државјанин Дејан В. му е одреден едномесечен истражен притвор по барање на обвинителството, поради опасност од бегство и повторување на кривичното дело.

За време на сослушувањето, возачот изјавил дека бил одморен пред патувањето, но дека во текот на возењето ненадејно почувствувал здравствени тегоби. Со тоа ги отфрлил тврдењата на дел од патниците дека заспал зад воланот.

— реклама —

Точната причина за излетувањето на автобусот сè уште не е утврдена. Државното обвинителство најавило дополнителни вештачења за да се разјаснат сите околности на несреќата, пренесува Хина.

— реклама —

Во несреќата животот го загубиле две патнички – 53-годишна хрватска државјанка и 17-годишна државјанка на Црна Гора.

Според податоците на загрепската полиција, пет лица се здобиле со тешки повреди, а уште 25 поминале со полесни повреди. Меѓу тешко повредените има четворица српски и еден хрватски државјанин.

— реклама —

Од полесно повредените, 18 се државјани на Србија, тројца на Хрватска, а по едно лице е од Белорусија, Романија, Босна и Херцеговина и Унгарија.