„Ниш-експрес“ по трагедијата во Хрватска: Нема да изнесуваме претпоставки додека трае истрагата

Автобуската компанија „Ниш-експрес“ изрази сочувство на семејствата на загинатите во тешката сообраќајна несреќа во Хрватска, во која автобус на компанијата се преврте на автопатот А3. Од компанијата велат дека нема да ги коментираат причините и околностите сè додека не заврши официјалната истрага.

— реклама —

„По повод тешката сообраќајна несреќа што се случи утрово во 7:25 часот на патот Белград – Загреб, кај местото Иваниќ-Град, изразуваме најдлабоко сочувство на семејствата на загинатите и искрено жалење за трагичниот настан“, се наведува во соопштението испратено до српскиот портал „Телеграф“.

— реклама —

Од компанијата посочуваат дека до завршувањето на официјалната постапка не можат да изнесуваат претпоставки ниту да ги коментираат околностите што се предмет на истрага. Истовремено, им се заблагодариле на хрватската полиција, пожарникарите, итната медицинска помош и лекарите за интервенцијата и помошта на местото на несреќата.

— реклама —

На повредените им посакале брзо и целосно закрепнување, најавувајќи дека јавноста ќе биде известена по добивањето официјални информации.

— реклама —

Во несреќата на автопатот А3 во Хрватска, на делницата меѓу клучките Иваниќ-Град и Ругвица, во насока кон Брегана, загинале две лица, шест биле тешко повредени, а 27 се здобиле со полесни повреди.