Хрватска воведува нови правила за вработување: Работодавците ќе мора да ја откријат платата, а нема да смеат да прашуваат колку земал кандидатот претходно

Хрватска подготвува значајни промени во Законот за работни односи, со кои работодавците ќе бидат обврзани да ги информираат кандидатите за почетната плата или распонот на заработувачката уште пред или за време на разговорот за работа.

— реклама —

Предложените законски измени, кои се на јавна расправа до 2 декември, предвидуваат поголема транспарентност на платите и дополнителни права за вработените. Новите правила ќе важат и за странските работници, меѓу кои и македонските државјани вработени во Хрватска.

Според предлогот, работодавците повеќе нема да смеат да ги прашуваат кандидатите колкава плата примале на претходното работно место. Истовремено, вработените ќе добијат право да побараат информации за просечната заработувачка на колегите кои извршуваат иста или слична работа.

— реклама —

Податоците ќе бидат поделени според пол, со цел да се откријат евентуалните разлики во платите меѓу мажите и жените.

— реклама —

Компаниите ќе мора да воспостават јасни критериуми за определување на платите, а за недоставување на бараните информации се предвидуваат и прекршочни санкции.

Предвидени се и промени кај користењето на годишниот одмор, особено за работниците кои поради болест или родителски обврски не успеале навреме да ги искористат слободните денови.

— реклама —

Хрватските власти објаснуваат дека измените се дел од усогласувањето со европските правила за транспарентност на платите. По евентуалното усвојување на законот, работодавците ќе добијат најмалку шест месеци за приспособување кон новите обврски.