Судските такси во Хрватска ќе се зголемат во просек за 115 проценти од 1 јуни, согласно Уредбата за тарифата на судските такси што ја усвои хрватската Влада.
Со измените, кои се испратени во собраниска процедура, се предвидува усогласување на законодавството со правните текови на Европската Унија.
Министерството за правда и дигитална трансформација останува на ставот дека зголемувањето е неопходно, а новата уредба предвидува покачување од 13,04 до 151,26 проценти.
Како пример е наведена таксата за поднесување тужба во граѓанска постапка со вредност од 3.000 евра, која од 1 јуни ќе се зголеми од 76 на 150 евра.
Дамир Хабијан изјавил дека во Словенија истата такса изнесува 195 евра, во Унгарија 180 евра, а во Србија 145 евра.
„Важно е да се нагласи дека износите не се менувале значително во последните 30 години, а сегашните 76 евра се далеку под просекот на земјите членки на Советот на Европа“, рекол Хабијан.
Со новите измени, максималната такса за граѓански предмети – тужба, противтужба, приговор на платен налог и приговор на решение за извршување – ќе изнесува 1.500 евра, наместо досегашните 663 евра.
Минималната такса за издавање копии или преписи од судскиот регистар ќе се зголеми од 0,66 на едно евро по страница.
Хабијан потсетил дека Законот за судски такси предвидува бројни исклучоци од плаќање за одредени категории граѓани, како и можност за ослободување од трошоци преку системот за бесплатна правна помош.
„Системот обезбедува правна заштита и еднаквост пред законот, така што зголемувањето нема негативно да влијае врз пристапот до суд“, тврди министерот.
Измените во законската рамка за адвокатурата ќе им овозможат на адвокатите работа во повеќе организациски форми, а адвокатски канцеларии од земји членки на ЕУ ќе можат да отвораат филијали и подружници во Хрватска.
