СДСМ побара оставка од министерот за внатрешни работи Панче Тошковски, оценувајќи дека премиерот Христијан Мицкоски со својата изјава за случајот со бодигардот обвинет за семејно насилство испратил опасна порака за релативизирање на насилството врз жените.
На прес-конференција, Розалија Ангелковска од Форумот на жени на СДСМ изјави дека е недозволиво брутално претепување на жена да се нарекува „мал престап“, оценувајќи дека со тоа директно се минимизира сериозноста на семејното насилство.
„За Мицкоски, тепањето жена е ‘мал престап’. Наместо јасна осуда, тој практично застана во заштита на насилникот и на министерот Панче Тошковски“, рече Ангелковска.
Од СДСМ обвинија дека власта создава систем во кој блиските луѓе до функционерите се заштитени и привилегирани, дури и кога се осомничени за тешки кривични дела.
Во обраќањето беа посочени и повеќе случаи на семејно и врсничко насилство, како и трагични настани за кои, според опозициската партија, институциите не реагирале навреме.
СДСМ оцени дека безбедносниот систем е во целосен распад и побара Тошковски веднаш да поднесе оставка. „Македонија стана држава во која насилството се нормализира, а одговорност нема“, порача Ангелковска.