Забавува вработувањето во САД: Во јуни отворени само 57.000 нови работни места

Вработувањето во Соединетите Американски Држави значително забави во јуни, покажуваат најновите податоци на американското Министерство за труд. Во текот на месецот биле отворени нето 57.000 нови работни места, што е повеќе од двојно помалку во споредба со мај, кога беа регистрирани 129.000 нови вработувања.

— реклама —

Ревидираните податоци покажуваат дека во април и мај биле отворени вкупно 74.000 работни места помалку отколку што првично беше проценето.

Во приватниот сектор во јуни биле отворени 49.000 нови работни места, што претставува преполовување во однос на претходниот месец.

— реклама —

Најголем раст на вработувањето е забележан во секторот на стручни и деловни услуги, каде што се отворени 36.000 нови работни места. Следуваат секторот за социјална грижа со 25.000 и здравството со 22.000 нови вработувања.

— реклама —

Од друга страна, во угостителството и секторот за слободни активности преовладувале отпуштањата, при што нето биле изгубени 61.000 работни места.

Бројот на невработени во САД во јуни изнесувал околу 7,1 милион лица, односно околу 200.000 помалку отколку во мај. Стапката на невработеност се намалила на 4,2 проценти.

Просечната плата по час пораснала за 0,3 проценти на месечно ниво и достигнала 37,64 долари, додека на годишно ниво е повисока за 3,5 проценти.