Директорот на Јавното комунално претпријатие „Бошава“, Петар Јованов, апелира случајот со забраната за користење на водата од градскиот водовод во Демир Капија да не се користи за дневнополитички цели, нагласувајќи дека дополнителните анализи треба да ја утврдат причината за различните резултати.
Забраната за пиење и подготовка на храна со водата беше воведена откако примероци, земени од истото мерно место во понеделникот и вторникот, покажале различни резултати.
„Нема потреба од создавање тензии и дополнителен страв кај граѓаните. Вакви ситуации не се нешто што се случува по првпат и најважно е да се постапува одговорно и согласно со стручно утврдените процедури“, порача Јованов.
Тој вели дека во моментов не може однапред да се утврди зошто двете анализи дале различни резултати. Како можни фактори ги наведува контаминацијата при земањето на примерокот, транспортот или обработката на мострата, но не ја исклучува ниту можноста проблемот да потекнува од самиот водоводен систем.
„Токму затоа се прават дополнителни анализи и проверки“, вели Јованов.
Според директорот на „Бошава“, анализата на примерокот, земен во понеделникот, ја спровел Институтот за јавно здравје – Скопје и станува збор за тип на анализа што се прави периодично. Вториот примерок, земен во вторникот, бил анализиран од Центарот за јавно здравје – Велес, кој редовно зема мостри од водоводниот систем согласно со планот и протоколите предвидени според бројот на жители.
Конечната состојба треба да биде утврдена преку дополнителните анализи и проверки.
