На четири плажи во Црна Гора е истакнато црвено знаме, што означува забрана за капење поради лош квалитет на морската вода.
Станува збор за плажите „Жукотрлица 02“ и „Жукотрлица 03“ во Бар, како и „Словенска плажа 01“ и „Пржно“ во Будва, каде што анализите покажале дека водата не ги исполнува санитарните стандарди.
Според Институтот за биологија на морето, анализите биле спроведени од 20 до 23 јули на вкупно 114 локации. Резултатите покажале дека на 78,9 проценти од плажите морската вода е со одличен квалитет, на 8,8 проценти добар, на исто толку локации задоволителен, додека на 3,5 проценти е оценета како лоша.
Во Улцињ, од 18 испитани плажи, на 14 водата е со одличен квалитет, на две е добра, а на две задоволителна. Во Бар, освен двете плажи со забрана за капење, на останатите 13 водата е оценета како одлична.
Во Будва, од вкупно 34 анализирани плажи, на 27 водата е одлична, на две добра, на три задоволителна, а на две е утврден лош квалитет. Во Тиват, Котор и Херцег Нови најголемиот дел од плажите имаат одличен или добар квалитет на водата.
Резултатите се доставени до надлежниот инспектор за води, кој треба да преземе соодветни мерки, додека Институтот ќе продолжи со дополнителни анализи на плажите каде што е утврдено загадување и навремено ќе ја информира јавноста за новите резултати.
