Зафироски: „Гостивар без вода, а тие вечерва ќе слават – како не ви е срам?“

Остри критики кон ВМРО-ДПМНЕ упати Општинската организација на СДСМ во Гостивар по повод најавениот партиски настан вечерва, обвинувајќи ја владејачката партија дека наместо одговорност за проблемите со водоснабдувањето и здравствената состојба во градот, организира прослава.

— реклама —

Претседателот на ОО СДСМ Гостивар, Бојан Зафироски, праша што, според него, има да слави ВМРО-ДПМНЕ во услови кога Гостивар повеќе недели се соочува со проблеми со водата.

„Што славите? Тоа што го отрувте целиот град? Тоа што пет недели нема вода? Тоа што не се знае ниту сега дали водата е безбедна за пиење?“, праша Зафироски.

— реклама —

Од СДСМ тврдат дека повеќе од 5.000 граѓани биле заболени и ја критикуваат институционалната реакција, посочувајќи дека сè уште не бил објавен документ и анализа со кои се потврдува исправноста на водата за пиење.

— реклама —

Зафироски го повика и премиерот Христијан Мицкоски да дојде во Гостивар, прашувајќи дали ќе присуствува на вечерниот партиски настан.

„Граѓаните со празни шишиња, без вода, а вие на партиски прослави. Сега со што ќе наздравите вечерва додека славите?“, рече претседателот на гостиварската организација на СДСМ.

— реклама —

Тој оцени дека состојбата бара одговорност, а не партиски прослави, и порача дека за случувањата во Гостивар треба да има одговорност.