Загреб набавува автомобили со камери за откривање непрописно паркирање

Градските власти во Загреб планираат да воведат нов систем за откривање непрописно паркирани возила преку три автомобили опремени со камери кои ќе ги снимаат регистарските таблички додека се движат низ улиците.

— реклама —

Новите возила на сообраќајното редарство ќе ги евидентираат автомобилите паркирани или запрени на места каде што тоа е забрането, а системот ќе овозможи и подготовка на налози за отстранување со пајак-служба. За разлика од шесте автомобили на „Загребпаркинг“, кои досега проверуваа само дали е платено паркирањето, новите ќе откриваат и други прекршоци.

— реклама —

Секој автомобил ќе има шест камери поставени на покривот, кои ќе ги снимаат двете страни на улицата при брзина до 50 километри на час. Системот треба да препознава од 1.500 до 3.500 регистарски таблички на час. За секое сомнително возило, сообраќајниот редар ќе добива најмалку две фотографии, податоци за табличката, времето и точната локација, по што ќе проверува дали постои дозвола за паркирање.

Градот очекува со новиот систем да ја зголеми ефикасноста на контролата и приходите, како и веројатноста за казнување на прекршителите. Во истиот систем ќе бидат поврзани и шесте постојни возила на „Загребпаркинг“, со што ќе се контролираат и неплатеното паркирање и непрописното оставање возила.

— реклама —

Новите автомобили ќе бидат хибридни, а податоците зачувани во нив, по правило, ќе се бришат по 24 часа.

— реклама —

Тендерот е објавен во средата во електронскиот систем за јавни набавки, а проценетата вредност изнесува 490.000 евра без ДДВ. Понудите ќе се примаат до 4 декември, додека договорот ќе трае два месеца. При изборот, цената носи 80 бодови, а искуството на стручњакот задолжен за воведување на системот – 20 бодови.