Претседателката на Либерално-демократската партија, Моника Зајкова, од собраниската говорница побара укинување на моделот на техничка влада и воведување електронско гласање, оценувајќи дека државата не смее да остане заробена во механизми од минатото.
„Ако по десет години сè уште велиме дека ни треба Пржинска влада за да имаме фер избори, тогаш ние признаваме дека за десет години не сме успеале да изградиме ниту една професионална институција“, изјави Зајкова.
Таа потсети на периодот на „заробена држава“, кога, како што рече, институциите биле партиски штабови, се издавале лажни лични карти, а граѓани биле носени на гласање под притисок, нагласувајќи дека техничката влада тогаш била неопходна, но денес претставува товар.
Според неа, јавноста сведочи на „парада на дополнителни министри и функционери“ кои наместо да работат, се занимаваат со реваншизам и политички препукувања.
„Не може приоритет на ова Собрание да биде кој партиски војник ќе стане технички министер. Наш приоритет мора да биде како да го заштитиме гласот на граѓанинот најефикасно и најекономично“, истакна Зајкова.
Таа предупреди дека додека се зголемува администрацијата, граѓаните плаќаат за, како што рече, „административен хаос“, во услови кога економијата слабее, а државата се задолжува.
Како решение, Зајкова предложи воведување електронско гласање и биометриска идентификација.
„Технологијата не познава партиска книшка и не може да биде уценета. Тоа е вистинскиот пат кон напредокот“, нагласи таа.
Во обраќањето, лидерската на ЛДП порача дека партијата не застанува ниту зад СДСМ, ниту зад ВМРО-ДПМНЕ, туку зад граѓаните.
„Ние не сме тука за да ги чуваме министерските места на СДСМ, ниту пак за да ги поддржуваме кадровските апетити на ВМРО. Ние сме тука за граѓаните“, рече Зајкова.
Таа ги повика пратениците да ја напуштат, како што оцени, „изместената дебата“ за техничка влада и да се фокусираат на реформи во Изборниот законик.
„Имаме ли работна група за Изборниот законик? Имаме! Да ја завршиме работата таму и системски да го затвориме прашањето“, порача Зајкова, додавајќи дека во ера на дигитализација е недозволиво Македонија да остане со застарени изборни модели.
