Зајкова: Реформите на Владата се за „два плус“, едвај ќе стигнеме до 40 отсто

Реформскиот напредок на Македонија е на ниво за оценка „два плус“, а владините тврдења за рекордни резултати не ја отсликуваат реалната состојба во институциите, оцени претседателката на Либерално-демократската партија (ЛДП), Моника Зајкова, во гостувањето во емисијата „Колегиум“ на ТВ Алфа.

Според Зајкова, доколку се земат предвид капацитетите и брзината со која институциите ги спроведуваат реформите, напредокот се движи меѓу 30 и 45 проценти. Таа смета дека власта ја одржува постојната состојба наместо да преземе конкретни чекори за забрзување на евроинтеграциите.

— реклама —

„За реализацијата на Реформската агенда, дури и во најдобро сценарио, до крајот ќе постигнеме максимум 35 до 40 проценти реализација од предвидените 100 проценти. Или да го кажам на средношколски – би добиле трогателна оценка ‘два плус’!“, изјави Зајкова.

Таа посочи дека граѓаните се заморени од постојаните политички расправии за европскиот пат на државата, оценувајќи дека недостига вистинска подготвеност за промени.

— реклама —

„Оваа тема веќе навистина е досадна и ги уморува граѓаните затоа што се гледа дека не се сака апсолутно ништо да се направи и дека живееме во некаква удобна стратегија на статус-кво“, рече Зајкова.

— реклама —

ЛДП повторно го актуализира својот предлог за уставни измени со одложено дејство, кои би стапиле во сила дури по ратификацијата на пристапните протоколи од земјите членки на Европската Унија. Партијата предлага и воведување национални самозаштитни клаузули, со цел да се спречат евентуални нови блокади и условувања во евроинтеграцискиот процес.

Од ЛДП наведуваат дека ваквите решенија имаат поддршка од европските либерали, обединети во АЛДЕ, кои се залагаат за преиспитување на механизмот на вето и воведување фазна интеграција во Европската Унија.

„Не сакаме да се ставиме како држава во позиција на оној феномен – ‘ме мрази учителката и затоа ми става слаба оценка’. Време е за проактивна дипломатија и конкретни заштитни клаузули дома“, порача Зајкова.

Од партијата ја повикаа Владата да престане да ги користи надворешните пречки како оправдување за застојот и да ги разгледа предложените заштитни механизми. Според ЛДП, напредокот кон Европската Унија треба да се темели на суштински реформи и конкретни резултати што ќе ги почувствуваат граѓаните, наместо на декларативни политички пораки.