Основачот на Фејсбук, Марк Закерберг, изјави дека холивудскиот филм „The Social Network“ погрешно ги прикажал неговите мотиви за создавањето на социјалната мрежа, оценувајќи дека најголемата невистина е тврдењето дека ја основал платформата за да освои девојка.
Закерберг, чие богатство денес се проценува на околу 189 милијарди долари, го основал Фејсбук во 2004 година, додека бил студент на Харвард.
Во гостување во емисијата „The Colin and Samir Show“, тој откри дека филмот го гледал само еднаш и тоа заедно со своите вработени.
„Знаев дека сите ќе го гледаат, па решивме да одиме заедно. Беше прилично необично искуство“, изјави Закерберг.
Тој призна дека филмот точно прикажал некои детали, како неговиот стил на облекување во тоа време, но смета дека целосно ги промашил неговите вистински мотиви.
„Најголемиот проблем беше што филмот сугерираше дека го создадов Фејсбук за да освојам девојка. Тоа едноставно не е точно“, рече Закерберг, додавајќи дека уште пред да го започне проектот бил во врска со својата сегашна сопруга Присила Чан.
Тој ги демантираше и тврдењата дека Фејсбук произлегол од неговиот претходен проект Facemash.
„Facemash беше шега и немаше никаква врска со Facebook. Но, со текот на годините на интернет се создаде цела митологија околу тоа како настанал Facebook“, објасни Закерберг.
Според него, Фејсбук уште од самиот почеток бил замислен како многу поголем и посериозен проект отколку што е прикажано во филмот. Компанијата подоцна ги презеде Instagram и WhatsApp, а во 2021 година го промени името во Meta.
