Законот за јавни набавки денеска повторно пред пратениците по ветото на Силјановска-Давкова

Законот за изменување и дополнување на Законот за јавните набавки денеска повторно е пред пратениците, откако претседателката Гордана Силјановска-Давкова одлучи да не го потпише указот за негово прогласување. Законот се разгледува во рамки на 129. пленарна седница, во трето читање.

— реклама —

За законските измени биле поднесени вкупно 2.158 амандмани. Владејачкото мнозинство предложило со амандман да се избрише членот 13, кој беше причина за ветото на претседателката, додека најголемиот дел од останатите амандмани се поднесени од СДСМ.

Силјановска-Давкова на 4 ноември го известила Собранието дека, по направената анализа и консултациите со експерти, согласно членот 75 став 3 од Уставот, нема да го потпише указот за законот усвоен на 26 октомври 2026 година.

— реклама —

Нејзините забелешки се однесуваат на членот 13, со кој се менува начинот на именување на претседателот и членовите на Државната комисија за жалби по јавни набавки. Досегашното решение предвидуваше петгодишен мандат со право на уште еден избор, односно најмногу десет години, додека новата формулација „со право на повторно именување“ не го ограничува бројот на можни реизбори.

— реклама —

Претседателката оценила дека ваквата формулација е правно непрецизна и остава простор за различни толкувања, вклучително и за неограничено продолжување на мандатите. Според неа, тоа може да доведе до прекумерна концентрација на моќ кај членовите на Комисијата, кои одлучуваат за трошење значителни средства од државниот буџет.

Во дописот до Собранието, Силјановска-Давкова се повикала и на мислењата и препораките на Венецијанската комисија, предупредувајќи дека ограничувањето на мандатите е важно за спречување прекумерно влијание во одлучувањето за јавните набавки.

— реклама —

Според членот 183 од Деловникот за работа на Собранието, кога претседателот на државата ќе одлучи да не го потпише указот, законот повторно се разгледува во трето читање, во рок од 30 дена од неговото донесување. Во оваа фаза амандмани можат да се поднесуваат само во однос на забелешките на претседателот. Рокот за нивно поднесување истекол во петокот, на 6 ноември.