Апелациски суд Скопје денеска ќе ги разгледува жалбите поднесени од одбраната и од Основно јавно обвинителство во случајот за грабнувањата и убиствата на 14-годишната Вања Ѓорчевска и велешанецот Панче Жежовски.
Предметот е во второстепена постапка по пресудата што ја донесе Основен кривичен суд Скопје на 25 јуни 2025 година, со која на доживотен затвор беа осудени Љупчо Палевски, Велибор Манев, Боре Видевски и Влатко Кешишев за кривичните дела грабнување и свирепо убиство.
Таткото на Вања, Александар Ѓорчевски, кој исто така беше опфатен со обвинението, беше ослободен поради недостиг на докази. Обвинителството поднесе жалба токму на овој дел од пресудата.
Според обвинението, обвинетите го испланирале грабнувањето на Вања со цел да изнудат пари за откуп од членови на нејзиното семејство. Воедно, грабнувањето на Панче Жежовски било извршено за да биде одземено неговото возило, кое потоа било користено при киднапирањето на девојчето во Скопје.
Вања Ѓорчевска беше пријавена за исчезната на 27 ноември 2023 година, додека Панче Жежовски исчезна три дена претходно, на 24 ноември. Телата на двајцата беа пронајдени на 3 декември 2023 година во близина на Скопје и Велес.
