Ако сте ја користеле опцијата „Not interested“ на ТикТок со надеж дека трајно ќе го исчистите вашиот feed од несакани содржини, ново истражување покажува дека ефектот е само привремен.
Студијата спроведена од истражувачи од Кури колеџот открила дека видеата што корисниците ги означуваат како непосакувани повторно се појавуваат кратко време откако ќе престанат да го користат ова копче.
Тимот предводен од професорот Пјотр Сапјежински и докторандот Леви Каплан тестирал автоматизирани ТикТок профили, кои претходно биле „обучени“ да следат одредени теми, како готвење, фитнес и спортско обложување, преку гледање повеќе од 200 видеа од секоја категорија.
Потоа, дел од профилите ја користеле опцијата „Not interested“, додека другите едноставно ги прескокнувале видеата. Резултатите покажале дека копчето е поефикасно на краток рок, но неговото влијание брзо исчезнува. Штом профилите престанале да го користат, несаканите содржини повторно почнале да се појавуваат во „feed“.
Истражувачите предупредуваат дека проблемот не е само во ограничената ефикасност туку и во недоследноста на системот, бидејќи резултатите се разликувале зависно од типот на содржината.
Според професорот Сапјежински, ваквите наоди би можеле да го привлечат вниманието на европските регулатори. Доколку платформата нуди алатка за контрола на содржината што не функционира онака како што е претставена, тоа би можело да се смета за таканаречен „темен шаблон“ според европскиот Закон за дигитални услуги (DSA).
Истражувањето повторно ја отвора дебатата за тоа колку навистина се ефикасни механизмите што социјалните мрежи им ги нудат на корисниците за контрола на содржините што ги гледаат.
