Потпретседателот на Соединетите држави Џеј-Ди Венс изјави дека САД би можеле да ја погодат Москва со санкции и потенцијална воена акција доколку рускиот претседател Владимир Путин не се согласи на мировен договор со Украина кој гарантира долгорочна независност на Киев, објави Волстрит журнал.
„Постојат економски алатки за влијание, сигурно има и воени алатки на влијание кои САД би можеле да ги користат против Путин“, рече Венс во интервју за весник.
„Има безброј формулации, конфигурации, но ние се грижиме Украина да има суверена независност“, рече тој.
Американскиот претседател Доналд Трамп завчера разговараше за војната со рускиот претседател Владимир Путин и одделно со украинскиот претседател Володимир Зеленски и им нареди на американските власти да започнат преговори за ставање крај на речиси тригодишниот конфликт.
Телефонските повици дојдоа веднаш откако американскиот секретар за одбрана Пит Хегсет им кажа на украинските воени сојузници во Брисел дека враќањето на границите на Украина од пред 2014 година, пред Русија да го анектира Крим, е нереално и дека САД не го гледаат членството на Киев во НАТО како дел од решението.
Украинците вчера беа загрижени дека Трамп се подготвува да ја продаде нивната земја по телефонскиот повик со Путин. Претходно денеска Трамп изјави дека Украина ќе биде вклучена во мировните преговори со Русија. Тој им рече на новинарите во Белата куќа дека Украина ќе има место на маса за време на какви било мировни преговори со Русија за ставање крај на војната.
Киев рече дека би било прерано да се разговара со Москва на денешната безбедносна конференција.
Претседателот е отворен за сите опции, рече Венс.
„Тој ќе рече: „Сè е на маса, ајде да се договориме“.
Потпретседателот Венс исто така рече дека Трамп би можел да се премисли во зависност од тоа како течат преговорите.
„Претседателот Трамп може да каже, погледнете, ние не го сакаме ова, можеби не ни се допаѓа, но ние сме подготвени да го вратиме на маса ако Русите не се добри преговарачки партнери или има работи кои се многу важни за Украинците, а ние можеби сакаме да ги тргнеме од масата“, рече тој.
