Постојаното чувство на замор е една од најчестите причини поради кои луѓето бараат лекарска помош. Иако многумина исцрпеноста ја поврзуваат со брзиот начин на живот, причините можат да бидат многу пошироки – од лош сон и стрес до сериозни здравствени состојби и недостаток на важни хранливи материи.
Британскиот лекар Амир Кан објасни дека секојдневните навики имаат големо влијание врз нивото на енергија.
„Лошата исхрана, прекумерното консумирање алкохол, стресот и прегорувањето на работа можат да предизвикаат замор“, вели докторот.
Тој додава дека исцрпеноста често е присутна и кај родителите и кај лицата кои се грижат за други членови на семејството, особено кога обврските и притисокот траат подолг период.
Една од најчестите причини за постојан замор е и лошиот квалитет на сонот.
„Сè што го нарушува квалитетниот сон, вклучувајќи ги работниот ритам и стресот на работното место, може да придонесе за чувство на исцрпеност“, објаснува Кан.
Според него, одредени лекови исто така можат да предизвикаат замор. Меѓу нив се седативи, антипсихотици, опиоиди, некои лекови против епилепсија, антихистаминици и бета-блокатори.
Лекарот предупредува дека терапијата никогаш не треба да се менува без консултација со стручно лице.
Заморот може да биде и симптом на бројни заболувања, меѓу кои инфекции, срцеви заболувања, хронични белодробни болести, дијабетес, проблеми со тироидната жлезда, мултипле склероза, ревматоиден артритис, синдром на хроничен замор, фибромијалгија и малигни заболувања.
Дополнително, недостатокот на железо, анемијата, ниските нивоа на витамин Д и витамин Б12, како и недостигот на фолна киселина, се меѓу најчестите нутритивни причини за исцрпеност.
Кан нагласува дека секој необјаснив замор, особено ако е проследен со симптоми како ненамерно губење на телесната тежина, треба да биде причина за лекарски преглед.
За подобрување на енергијата, тој препорачува седум до осум часа квалитетен сон, балансирана исхрана, намалување на алкохолот, редовна физичка активност, контрола на стресот и одржување на здрава телесна тежина.
