Западна Европа го забележа најтоплиот јуни откако се водат мерења, соопшти европската служба за климатски промени „Коперникус“, предупредувајќи дека екстремните горештини ќе стануваат сè почести и поинтензивни.
Според најновите податоци, просечната температура во Западна Европа во јуни изнесувала 20,74 степени Целзиусови, што е повеќе од три степени над просекот за периодот од 1991 до 2020 година.
Изминатите три месеци регионот беше погоден од три силни топлотни бранови, а Шпанија и Португалија и оваа недела повторно се соочуваат со екстремно високи температури.
„Јуни 2026 година јасно покажува колку длабоко се менува климата. Сведоци сме на сè поинтензивни топлотни бранови, потопли океани и растечки ризици за луѓето, екосистемите и инфраструктурата“, изјави Саманта Бурџес од Европскиот центар за среднорочни временски прогнози.
Според официјалните податоци, само во Франција, Белгија, Шпанија и Холандија, за време на јунскиот топлотен бран, се регистрирани повеќе од 4.700 дополнителни смртни случаи, а се проценува дека конечната бројка во Европа е уште поголема.
Екстремните температури придонесоа и за големи шумски пожари на Пиринејскиот Полуостров и во Франција, како и за влошување на сушните услови.
На глобално ниво, јуни беше вториот најтопол месец во историјата за тој период од годината, а површината на морињата достигна рекордни температури за месец јуни. Научниците наведуваат дека, иако климатскиот феномен Ел Нињо влијаел врз глобалното затоплување на океаните, главната причина за екстремните горештини во Европа остануваат климатските промени.
