Агенцијата за храна и ветеринарство (АХВ) го засилува надзорот на терен за навремено откривање на вирусот на Западнонилската треска кај птиците, преку дополнително земање примероци и лабораториски испитувања низ целата држава.
Засилениот надзор се спроведува паралелно со активностите за следење на авијарната инфлуенца, односно птичјиот грип, при што се тестираат примероци од птици за утврдување на присуство на вирусот и антитела. Со активностите се опфатени одгледувалишта на живина за некомерцијални цели, птици што се чуваат во кафези или други оградени простори, како и одгледувалишта на водни птици во дворови и селски стопанства.
Се земаат примероци од различни видови домашна живина, меѓу кои кокошки, мисирки, бисерки, фазани, еребици, потполошки и ноеви, но и од диви птици како гуски, патки, лебеди, штркови, чапји, соколи, галеби, страчки, бувови, корморани, јастреби и други видови.
АХВ потсетува дека пасивниот надзор се спроведува во текот на целата година преку пријавување на сомнителни клинички знаци, како и на угината живина, водни и диви птици. Во рамките на засилениот надзор, корисниците на дивечот во ловиштата, зоолошките градини, националните паркови и оние што чуваат птици во заробеништво треба да пријават секоја пронајдена угината дива птица, од која, доколку е погодна за испитување, ќе се земе примерок.
Од АХВ апелираат и до ловните друштва да го пријавуваат отстрелот на диви птици во текот на ловната сезона, бидејќи и од нив може да бидат земени примероци за лабораториско испитување.
Во периодот од 24 до 27 август АХВ примила повеќе од 100 пријави од граѓани за пронајдени угинати птици. Сепак, од Агенцијата појаснуваат дека не секоја угината птица е погодна за тестирање на Западнонилска треска. Досега се добиени два позитивни лабораториски резултати – еден од угината птица пронајдена во Скопје и еден од птица пронајдена во Ресен.
АХВ посочува дека постапува по најголем дел од пријавите, согласно проценката за тоа дали постои можност за земање примерок и лабораториско испитување. Во Скопје, пронајдените угинати птици се подигнуваат во соработка со Секторот за општи и комунални дејности на Град Скопје, по што, кога примерокот е соодветен, се врши тестирање, безбедно отстранување на птицата и дезинфекција на местото.
Одгледувачите на живина се повикуваат да ги почитуваат мерките за биосигурност, да го ограничат контактот меѓу домашната живина и дивите птици и навремено да пријават секоја зголемена или невообичаена смртност кај живината.
Од АХВ истовремено апелираат граѓаните да не создаваат непотребна загриженост доколку во урбана средина се појави поединечна угината птица. Особено внимание треба да се посвети доколку во исто подрачје, за краток период, се забележат поголем број угинати гаврани или други диви преселни птици, за што треба да се извести Агенцијата.
Според АХВ, навремениот надзор, лабораториското испитување и брзото пријавување на сомнителни случаи овозможуваат навремено преземање мерки за заштита на здравјето на животните и јавното здравје.
