Во Грција продолжува да расте бројот на случаи на Западнонилска треска, а надлежните здравствени власти регистрирале вкупно 157 заразени и 13 смртни случаи од почетокот на сезоната.
Според последниот неделен извештај на Националната организација за јавно здравје (ЕОДИ), сите починати пациенти биле на возраст над 65 години, со просечна возраст од 82 години. Само во изминатата седмица биле потврдени 47 нови случаи, како и четири смртни случаи.
Од вкупниот број заразени, кај 116 лица се развиле симптоми поврзани со централниот нервен систем, меѓу кои енцефалитис, менингитис или акутна парализа. Кај останатите 41 пациент биле регистрирани поблаги симптоми.
Во моментов, 42 лица се на болничко лекување, додека 92 пациенти се веќе отпуштени од болница. Кај десет заразени не било потребно болничко лекување.
Најголем број случаи се регистрирани во Атика, поширокиот регион на Атина, каде што се потврдени 104 заразени. Уште 46 случаи се регистрирани во Тесалија, северна Грција и на Пелопонез, додека за седум случаи сè уште се спроведува епидемиолошка истрага.
Поради зголемениот број заразени во Атика, грчките власти ги засилија мерките против комарци, при што активностите за запрашување се зголемени за 30 проценти.
Првиот случај на Западнонилска треска оваа сезона во Грција бил регистриран во почетокот на јули. Вирусот во земјата се појавува сезонски, а најтешка била 2018 година, кога биле регистрирани 317 случаи и 51 смртен исход. Минатата година имало 96 случаи и девет починати лица.
