Бројот на случаи на западнонилска треска во Грција продолжува брзо да расте, а најголем број заразени се регистрирани во поширокото подрачје на Атина. Од почетокот на годината досега во земјата се потврдени 232 случаи, при што 19 лица починале од последиците на болеста, соопшти Националната организација за јавно здравје (ЕОДИ).
Станува збор за значителен пораст во краток период. На крајот на јули биле регистрирани 42 случаи, додека пред една недела бројката изнесувала 157. Со најновите податоци, бројот на заразени сега е повеќе од петпати поголем во однос на крајот на јули.
Здравствените власти посочуваат дека најголем број заболени има во поширокиот регион на главниот град, што претставува дополнителен ризик, имајќи предвид дека Атина и околината се меѓу најпосетуваните туристички подрачја во земјата.
Епидемиолозите ги повикуваат граѓаните, но и посетителите, да преземаат мерки за заштита од убоди од комарци. Особено се препорачува редовно користење и повторно нанесување средства за заштита од инсекти, особено во периодите кога комарците се најактивни.
Западнонилскиот вирус се пренесува преку убод од заразени комарци. Кај најголем дел од заразените инфекцијата поминува без симптоми или предизвикува благи тегоби.
Сепак, потешките форми на болеста почесто се појавуваат кај повозрасните лица и кај луѓето со одредени претходни здравствени состојби. Во такви случаи инфекцијата може да предизвика сериозни компликации и да биде животозагрозувачка.
