Во повеќе скопски населби и општини е прогласена епидемија на западнонилска треска, откако од почетокот на годината се потврдени 24 случаи на заболување. Регистрирани се и два сомнителни случаи, а здравствените власти информираат и за еден смртен исход.
Епидемијата го опфаќа подрачјето на Кисела Вода, односно реонот на Пржино, како и Аеродром, Бутел, Гази Баба, Илинден, Драчево, Идризово, Јурумлери и Трубарево.
Од 24-те потврдени случаи, 20 пациенти се хоспитализирани на Клиниката за инфективни болести. Петмина од нив се во тешка, односно критична состојба и се приклучени на механичка вентилација.
Најголем дел од заболени се повозрасни мажи, главно над 60 години. Според информациите од здравствените власти, дел од нив биле изложени на комарци при земјоделски и градинарски активности во приквечерните и раните утрински часови.
Викендов починал 83-годишен пациент кај кого била потврдена западнонилска треска. Тој имал и повеќе придружни заболувања, што дополнително го зголемило ризикот од тешка клиничка слика.
Институтот за јавно здравје и Центарот за јавно здравје – Скопје ја прогласија епидемијата по зголемениот број регистрирани случаи.
Податоците за изминатите 15 години покажуваат дека во Македонија досега се регистрирани вкупно пет смртни случаи поврзани со западнонилска треска.
