Полицијата во Ливно спроведува истрага по пријава за уништување и палење знамиња на Босна и Херцеговина и на поранешната Република Босна и Херцеговина, кои биле поставени покрај локално игралиште во селото Голињево.
Инцидентот бил пријавен утринава, откако жителите забележале дека знамињата во текот на ноќта биле отстранети, оштетени или запалени.
Портпаролот на Управата на полицијата при Министерството за внатрешни работи на Кантон 10, Славко Кришто, потврдил дека биле уништени вкупно 13 знамиња.
„Полициските службеници излегоа на терен и ги утврдија фактите. Во близина на мост беа пронајдени две од исчезнатите знамиња. Едното беше закачено на електричен столб, искинато при обид за насилно отстранување и делумно изгорено во долниот дел. Друго државно знаме беше пронајдено во близина на игралиштето и беше речиси целосно изгорено. Останатите знамиња не се пронајдени и најверојатно се кај засега непознат сторител или повеќе лица“, изјавил Кришто.
Од полицијата информираат дека се преземаат сите неопходни мерки за идентификување и пронаоѓање на одговорните лица.
По инцидентот реагираше и Градската организација на СДА во Ливно, од каде што остро го осудија палењето на државното знаме на Босна и Херцеговина.
„Остро го осудуваме палењето на знамето на државата Босна и Херцеговина во селото Голињево кај Ливно како вандалски чин насочен против државните обележја на Босна и Херцеговина“, соопштија од СДА.
Оттаму ги повикаа надлежните институции што побрзо да го расветлат случајот и сторителите да бидат изведени пред лицето на правдата.
