Запленети дрога, пиштоли, пушки и муниција при полициска акција низ државата

Шеснаесет лица се лишени од слобода, а при претреси на повеќе локации низ државата се запленети дрога, огнено оружје, муниција и пари. Акцијата ја спровел Одделот за криминалистичка полиција, во координација со секторите за внатрешни работи и Единицата за службени кучиња, во текот на 16 и 17 октомври.

— реклама —

Во рамки на засилените активности за откривање и сузбивање на криминалот биле извршени вкупно 47 претреси во домови и други помошни простории.

— реклама —

При претресите биле пронајдени и одземени поголема количина марихуана, повеќе пакувања кокаин, како и помали пакувања кокаин подготвени за понатамошна продажба. Полицијата запленила и пиштоли, пушки, разновидна муниција, парични средства и други предмети за кои постои сомнение дека потекнуваат од кривични дела.

— реклама —

Во врска со случаите биле поднесени 11 кривични пријави за неовластено производство и пуштање во промет наркотични дроги, психотропни супстанции и прекурсори, според член 215, како и за недозволено изработување, држење и тргување со оружје или распрскувачки материи, според член 396 од Кривичниот законик.

Од Министерството за внатрешни работи информираат дека продолжуваат со засилени активности за откривање и санкционирање на сите форми на криминал, со цел зголемување на безбедноста на граѓаните.