Запленети два тони небезбедна храна на зелениот пазар во Ченто

Околу два тони храна биле отстранети од промет на зелениот пазар во скопската населба Ченто поради несоодветни хигиенски услови и продажба надвор од местата предвидени за таа намена.

— реклама —

Акцијата ја спровела Агенцијата за храна и ветеринарство (АХВ), во соработка со Комуналната инспекција на Град Скопје и Државниот пазарен инспекторат, во рамките на вонредна инспекциска контрола.

— реклама —

Инспекторите проверувале дали храната се продава во соодветни услови и дали се почитуваат законските прописи за нејзино безбедно складирање и продажба. При контролата било утврдено дека различни видови храна се нуделе надвор од предвидените продажни места и во нехигиенски услови, со што се зголемувал ризикот за безбедноста на производите и здравјето на потрошувачите.

Запленетата храна е отстранета од промет, а надлежните инспекциски служби најавуваат продолжување на контролите и преземање мерки во рамките на своите законски овластувања.

— реклама —

Од АХВ информираат дека и во наредниот период ќе спроведуваат засилени инспекциски контроли, самостојно и во соработка со другите надлежни институции, со цел заштита на здравјето на граѓаните и обезбедување безбедна храна на пазарот.

Агенцијата упатува апел до сите оператори со храна да ги почитуваат законските обврски и да обезбедат соодветни хигиенски услови при ракувањето, складирањето и продажбата на производите.