Запленети над 500 кубни метри нелегално исечени дрва, Шумската полиција поднесе 140 пријави

Над 500 кубни метри нелегално исечена дрвна маса се запленети во текот на септември и почетокот на октомври, а Шумската полиција поднела 140 пријави во рамките на засилените акции против незаконската сеча и трговијата со дрва.

— реклама —

Во акциите, спроведени низ целата држава, привремено се одземени и 13 товарни и 17 патнички возила, девет трактори, како и моторни пили, приколки, секири и друга опрема користена за нелегална сеча и превоз на дрвна маса.

Засилените контроли се одвиваат паралелно со редовните активности на Шумската полиција, со посебен акцент на подрачјата каде што дејствуваат организирани групи на дрвокрадци. Надлежните институции се насочени и кон спречување на незаконското снабдување со огревно дрво на домаќинствата и производствените капацитети, со што се нанесува значителна штета на шумскиот фонд.

— реклама —

Министерот за земјоделство, шумарство и водостопанство Борче Серафимовски најави дека акциите ќе продолжат и во наредниот период на целата територија на државата.

— реклама —

„Заштитата на шумите е јавен интерес и наша институционална одговорност. Шумската полиција ја има целосната поддршка на Министерството да постапува одлучно и доследно против незаконската сеча, транспортот и трговијата со дрва, во рамките на своите законски овластувања“, порача Серафимовски.

Во пресрет на грејната сезона, Министерството апелира до граѓаните огревното дрво да го набавуваат исклучиво од лиценцирани продавачи и складови. Со купување дрва од легални извори се придонесува за сузбивање на нелегалната трговија и зачувување на шумите.

Од граѓаните се бара и да ги пријавуваат сомнежите за незаконска сеча, транспорт или продажба на дрва до Шумската полиција и другите надлежни органи.