За еден месец запленети 734 кубни метри дрва и поднесени 147 пријави за дрвокрадство

Шумската полиција во текот на октомври спровела засилени контроли против бесправната сеча, транспортот и трговијата со дрва со незаконско потекло, при што биле запленети 734 кубни метри дрвна маса и поднесени 147 прекршочни и кривични пријави.

— реклама —

Најголем дел од запленетите дрва се даб и бука, односно 288 кубни метри даб и 274 кубни метри бука. Одземени се и 51 кубен метар мешано дрво, како и 121 кубен метар техничко дрво, односно трупци.

— реклама —

Во акциите привремено биле одземени и 11 товарни и 15 патнички возила, осум трактори, 13 приколки и 18 моторни пили. До надлежните судови биле поднесени 122 прекршочни пријави, а до Основното јавно обвинителство 25 кривични пријави.

— реклама —

Министерот за земјоделство, шумарство и водостопанство, Борче Серафимовски, порача дека контролите ќе продолжат и дека ќе се бара одговорност не само од лицата што бесправно сечат, туку и од оние што ја препродаваат незаконски стекнатата дрвна маса.

— реклама —

Тој нагласи дека од дрвокрадството заработуваат поединци, додека штетата ја трпат сите граѓани, додавајќи дека заштитата на шумите е заедничка обврска.