Со изложби посветени на македонската драматургија и современата уметност започна 17. издание на традиционалната културна манифестација „Карпошово културно лето“.
Првиот ден од манифестацијата беше посветен на уметноста и културното творештво, со две изложби кои го одбележаа почетокот на годинешната програма.
Во рамки на отворањето беше поставена изложба на постери и плакати од театарските претстави на еден од најзначајните македонски драматурзи, Горан Стефановски. На настанот присуствуваше и неговиот син, а изложбата претставува почит кон авторот чие творештво остави значаен белег во македонската култура.
Истовремено, во Сити Мол започна и патувачката изложба „ReArt“, која преку современи уметнички изрази ја доближува уметноста до пошироката јавност и внесува нова креативна енергија.
Од Општина Карпош најавуваат дека „Карпошовото културно лето“ и во наредниот период ќе понуди разновидни содржини од областа на културата и уметноста, со цел збогатување на културниот живот на граѓаните.
