Започна изградбата на новиот Младински културен центар во Кавадарци

Локацијата во Кавадарци, која од 1979 година стоела напуштена и нереализирана, конечно ќе добие нова намена. Општина Кавадарци преку јавен повик и партнерство со соинвеститор започна со изградба на нов деловен објект, во кој на површина од околу 800 квадратни метри ќе биде сместен Младински културен центар.

— реклама —

Општината ќе го добие просторот на вториот кат од објектот, со посебен влез и лифтови, по принципот „клуч на рака“ и без дополнителни финансиски вложувања од општинскиот буџет.

Градоначалникот Митко Јанчев истакна дека станува збор за значајна одлука со која се оживува поранешниот карабински простор.

— реклама —

„Нашите млади тука ќе добијат најмодерен центар каде што ќе можат да творат, да се забавуваат и да се тргнат од секојдневните пороци. Просторот ќе содржи ликовни соби за колонии, музички простории, кино и забавни содржини за малолетници, а со нив ќе работат и ментори од наставниот кадар. Очекувам за две години објектот да биде целосно завршен“, изјави Јанчев.

— реклама —

Претседателот на Советот на Општина Кавадарци, Стојанчо Рамов, истакна дека овој дел од градот, на потегот меѓу Северниот и Западниот булевар, во моментов доживува значајна градежна и урбана трансформација.

„Покрај новиот кружен тек, објектите на „Лидл“, „Веро“ и биопазарот, овој дел од Кавадарци добива сосема ново урбано руво. Со овој Младински културен центар им оставаме на идните генерации модерен простор во кој ќе можат да ги развиваат своите вештини и потенцијали“, порача Рамов.

Комплетната изградба на објектот се очекува да заврши во рок од две години.