Судскиот процес за најсмртоносната железничка несреќа во Грција започнува денес во Лариса, три години по трагедијата во Темпе која однесе 57 животи и повреди десетици лица. Поради големиот број обвинети, судењето ќе се одржи во специјално прилагодена сала во Конференцискиот центар на кампусот „Гаиополис“ на Универзитетот на Тесалија.
Членови на синдикати, студентски здруженија, политички и социјални организации, како и граѓани, се собраа пред салата, носејќи транспаренти со пораки за правда и побезбеден транспорт.
На судењето се очекува да сведочат 352 лица, вклучувајќи преживеани и роднини на жртвите, а ќе учествуваат околу 250 адвокати, што ја покажува големината и сложеноста на случајот.
Меѓу обвинетите се високи службеници од грчката железница, фирмата за одржување и операторот – OSE, ERGOSE и Hellenic Train, кои работеа во периодот од 2016 до почетокот на 2023 година. Им се суди и на станицниот контролор кој бил на должност таа ноќ, како и двајца колеги кои не биле присутни на работа.
Обвинетите се соочуваат со можни казни доживотен затвор. Никој од нив во моментов не е во притвор. Политички лица не се меѓу обвинетите.
Роднините на жртвите ги обвинија властите за обиди да се сокрие доказниот материјал.
Владата на Нова Демократија, негирајќи било каква вина, ветува дека ќе обезбеди правда и целосна реформа на железничкиот систем до 2027 година.
Трагедијата се случи на 28 февруари 2023 година, кога патнички воз од Атина за Солун, со многу студенти, се судри со товарен воз во кањонот Темпе. Судирот предизвика голем пожар кој го зафати предниот дел на возот. Телата на дел од жртвите никогаш не биле пронајдени.
