Завршена четвртата тура прскање против комарци во Скопје, спроведени и шест вонредни прскања

Засилени активности за сузбивање на комарците се спроведуваат во Скопје и во подрачјата каде што е регистрирана појава на случаи на западнонилска треска, информира министерот за здравство, Сашо Клековски.

— реклама —

Тој посочи дека е завршена четвртата тура прскање против возрасни комарци во Скопје, при што се реализирани и авионско и земјено прскање. Авионското прскање било спроведено на 20 и 21 август, додека земјеното траело од 20 до 26 август.

— реклама —

Покрај редовната тура, досега се реализирани и шест прскања по индикација, односно во подрачја каде што било утврдено дека е потребна дополнителна интервенција.

Во Гази Баба било извршено прскање на површина од повеќе од 400 хектари, додека второ прскање против возрасни комарци било спроведено во Кисела Вода, односно во Драчево. Двете интервенции биле реализирани на 14 и 15 август.

— реклама —

Дополнителни, вонредни прскања по индикација биле спроведени и во Зелениково, Студеничани, Бутел и Ѓорче Петров.

Клековски појасни дека сите овие активности се реализираат во таргетирани подрачја, односно во места каде што е регистрирана појава на случаи.