Заврши судењето за полицајците од Кочани во случајот „Пулс“; „Здружение 16 март“: Ова не е крај, туку почеток на борбата за правда

Вчера заврши судењето против тројцата полициски службеници од Кочани обвинети за неизвршување службена должност во случајот поврзан со дискотеката „Пулс“. Судот најави дека пресудата ќе биде објавена на 5 мај. Обвинетите се товарат дека при контроли во угостителскиот објект не постапиле согласно законските обврски, со што, според обвинението, овозможиле неправилности и прибавување корист за правно лице.

— реклама —

Од „Здружението 16 март“ велат дека очекуваат правда за 63-те жртви и нивните семејства.

— реклама —

„Заврши судскиот процес против тројцата полициски службеници од Кочани. За некого ова е само уште еден предмет. За нас – ова е првата разврска во борбата за правда за нашите најмили.

Чекаме пресуда!

Со тежина во срцето, со болка што не поминува и со надеж што не смееме да ја изгубиме. Се надеваме дека судот ги видел сите пропусти, сите грешки, сите моменти каде системот потфрли – и дека ништо нема да остане занемарено. Бидејќи зад овој случај не стојат бројки.

Стојат 63 животи, 63 семејства што секој ден живеат со празнина што никогаш нема да се пополни.

Ова не е крај. Ова е почеток. Ќе останеме тука. Ќе гледаме. Ќе паметиме. И нема да престанеме да бараме:

Вистинска, целосна и заслужена правда!“, стои во објавата.

— реклама —