Захарова го обвини Брисел за цензура: Ги блокира руските ставови

Портпаролката на руското Министерство за надворешни работи, Марија Захарова, остро реагираше по информациите дека бриселското издание на „Политико“ во последен момент се откажало од објавување авторски текст на рускиот министер за надворешни работи, Сергеј Лавров.

— реклама —

Според Захарова, ваквата одлука претставува доказ дека во Европската Унија се ограничува просторот за ставови и информации кои доаѓаат од Русија.

— реклама —

„Сега добивме директен доказ дека колективниот Брисел, кој постојано зборува за демократија, слобода на говор и плурализам на мислења, блокира информации од Русија“, изјави Захарова, пренесуваат руските медиуми.

Реакцијата следува откако руското Министерство за надворешни работи соопшти дека „Политико Европа“ се откажало од објавување на текстот на Лавров посветен на односите меѓу Русија и Европската Унија, како и на актуелната состојба во Украина.

— реклама —

Во написот со наслов „Украина, Европа и глобалната безбедност“, Лавров изнесува став дека европските земји не се неутрални во конфликтот во Украина и дека не водат искрен дијалог со Москва. Тој тврди дека преговорите се користат како средство за политички притисок и ултиматуми, а како една од главните цели на европските лидери го наведува зачувувањето на власта на украинскиот претседател, Володимир Зеленски.

Случајот предизвика нова размена на обвинувања меѓу Москва и Брисел во контекст на односите меѓу Русија и Европската Унија, кои остануваат сериозно нарушени поради војната во Украина.