Украинскиот претседател Володимир Зеленски побарал од американскиот претседател Доналд Трамп да посредува кај Илон Маск за да ѝ биде дозволено на Украина да го користи сателитскиот систем „Старлинк“ за наведување напади врз цели на територијата на Русија, но барањето било одбиено.
Според информациите, Зеленски ова барање лично му го пренел на Трамп за време на нивната средба во Овалната соба, а подоцна истото го повторил и пред членови на американскиот Конгрес. Трамп, сепак, не се согласил со предлогот.
Во моментов, „Старлинк“ се користи на украинска територија, вклучително и во окупираните региони, но Илон Маск досега не дозволил системот да се користи за операции длабоко на руска територија.
Барањето доаѓа во време кога Украина бара алтернативи поради намалените резерви на ракети за противвоздушните системи „Патриот“. Истовремено, Трамп сигнализираше дека сѐ уште не е донесена конечна одлука дали Украина ќе добие лиценца за домашно производство на овие системи.
Американскиот сенатор Мајк Раундс изјави дека Зеленски и понатаму инсистира на поголем пристап до „Старлинк“, оценувајќи дека тоа би ја подобрило прецизноста на украинските системи со среден и долг дострел.
Одобрувањето на ваква употреба, според американските медиуми, би можело да претставува дополнителен ризик и за компанијата на Илон Маск, бидејќи западните разузнавачки служби претходно предупредија дека Русија развива технологии за потенцијално нарушување или напад врз сателитските системи како „Старлинк“.
Зеленски престојуваше во Вашингтон каде, покрај средбата со Трамп, разговараше и со американски сенатори за дополнителна воена поддршка, системите „Патриот“ и идната соработка меѓу САД и Украина. Според американски извори, украинскиот претседател нагласил дека Киев има потреба од поголеми можности за прецизни удари и поефикасна воздушна одбрана.
