Зеленски: Бевме подготвени да ги запреме нападите врз руските рафинерии, но САД не ни дадоа системи за одбрана

Украинскиот претседател Володимир Зеленски откри дека Киев бил подготвен да ги запре нападите врз руските нафтени рафинерии доколку САД, за возврат, испорачаат системи за противбалистичка одбрана, со кои би ја заштитиле украинската енергетска инфраструктура од руски напади. Сепак, овие системи не биле испорачани, изјави Зеленски на прес-конференција во Брисел.

Зеленски рече дека договорот меѓу американскиот претседател Доналд Трамп и рускиот претседател Владимир Путин за дизелот го изненадил Киев, бидејќи бил постигнат без знаење на украинската страна.

— реклама —

„Договорот за дизелот нè изненади“, изјави украинскиот претседател, нагласувајќи дека за него се неприфатливи договори што ги одредуваат потезите на Украина без претходна координација со Киев.

— реклама —

Тој истакна дека Украина треба да биде известена за договорите што се однесуваат на нејзините одговори на руските напади, особено кога станува збор за дејствувањето на руска територија.

Зеленски откри дека на американската страна ѝ предложил компромис. Украина била подготвена да ги приспособи своите активности на барањата на Вашингтон, кој сметал дека е потребно да се запрат нападите врз руските рафинерии. За возврат, Киев побарал системи за противбалистичка одбрана за заштита на сопствената енергетска инфраструктура.

— реклама —

„Мојот предлог до американската страна беше: во ред, партнери сме, вам ви е потребен прекин на нападите врз рафинериите. Дури и ако сите аналитичари велат дека тоа нема да влијае врз цените на горивата, вие и понатаму верувате дека е неопходно. Но, бидејќи руските сили ќе го напаѓаат нашиот енергетски систем, дајте ни системи за противбалистичка одбрана за да го заштитиме. Не ни требаат многу, само додека тоа е важно за вас. Но, не ги добив. Чудно!“, рече Зеленски.

Украинскиот претседател додаде дека од европските партнери добил поддршка за својот став, за што им се заблагодари. Тој ја оцени украинската позиција како јасна, искрена и праведна.

Сепак, Зеленски изрази загриженост дека по договорот за дизелот САД би можеле да склучат и други енергетски договори со Русија. Тој не го криеше разочарувањето од ставот на Вашингтон, нагласувајќи дека е болно кога САД избираат да застанат на страната на другата држава.